pour prier Nostre-Dame
Emperière des infernaulx palux,
Recevez-moy, vostre humble chrestienne,
Que comprinse soye entre vos esleuz,
Ce non obstant qu'oncques riens ne valuz.
Les biens de vous, ma Dame et ma Maistresse,
Sont trop plus grans que ne suys pecheresse,
Sans lesquelez bien ame ne peult merir
N'avoir les cieux, je n'en suis menteresse.
En ceste foy je vueil vivre et mourir,
A vostre Filz dictes que je suys sienne;
De luy soyent mes pechez aboluz:
Pardonnez-moy comme à l'Egyptienne,
Ou comme il feit au clerc Theophilus,
Lequel par vous fut quitte et absoluz,
Combien qu'il eust au diable faict promesse
Preservez-moy que je n'accomplisse ce !
Vierge portant sans rempure encourir
Le sacrement qu'on celebre à la messe.
En ceste foy je vueil vivre et mourir.
Femme je suis povrette et ancienne,
Qui riens nesçay, oncques lettre ne leuz;
Au moustier voy dont suis paroissenne,
Paradis painct oùsont harpes et luz,
Et ung enfer où damnez sont boulluz:
L'ung me faict paour, l'aultre joye et liesse.
La joye avoir fais-moy, haulte Deesse,
A qui pecheurs doibvent tous recourir,
Comblez de foy, sans faincte ne paresse.
En ceste foy je vueil vivre et mourir.
